Баранавічы: бацькоўскія сходы – надзейны спосаб забеспячэння аўдыторыі для праўладнага кандыдата і яўкі на датэрміновым галасаванні
Першы дзень датэрміновага галасавання на двух выбарчых участках №15 і 21, якія размешчаны ў сярэдняй школе №21, супаў з агульнашкольным бацькоўскім сходам. Бацькам было сказана прыйсці з пашпартамі, кажа назіральнік за выбарамі ад Беларускага Хельсінскага Камітэта Сяргей Гоўша. На сход з выступам прыехала дэпутат Палаты прадстаўнікоў і кандыдат у адной асобе Вольга Палітыка. Пасля нядоўгай яе прамовы выступіў дырэктар школы. Ён сказаў: “Вось наш кандыдат, давайце яго падтрымаем.” Бацькі прыслухаліся да дырэктара і пайшлі галасаваць.
У першы дзень галасавання на выбарчым участку №15 прагаласавала 83 чалавекі, на 21-м – 73.
Заўтра запланаваны сход у сярэдняй школе №16, дзе размешчаны выбарчы ўчастак №19
Незалежнымі назіральнікамі былі выкліканы назіральнікі місіі АБСЕ, якія зафіксавалі гэты факт.
