Забяспечыць спакойную абстаноўку падчас выбараў у Бабруйскім раёне ўзялася мабільная група ідэолагаў
Раённыя ідэолагі вырашылі заняцца праблемамі сяльчан, каб забяспечыць спакойную абстаноўку падчас выбарчай кампаніі. Пра гэта паведамляе газета "Трыбуна працы" ў артыкуле пра семінар ідэалагічнага актыву, з назвай "Идеологическая работа в действии".
"З мэтай сацыялагічнага маніторынгу і зняцця праблем у вяскоўцаў пры райвыканкаме створана мэтавая мабільная група. Ужо адбыліся выезды ў 10 населеных пунктаў, у ходзе якіх высвятлілася, што больш за ўсё жыхароў раёна хвалююць жыллёва-камунальныя пытанні", - паведамляе раёнка.
Намеснік начальніка аддзела ідэалагічнай працы райвыканкаму Дзмітрый Вяроўкін адзначыў, што вялікую ўвагу трэба звярнуць на афармленне выбарчых участкаў, а таксама правядзенню тлумачальнай працы, разгляду і своечасоваму вырашэнню зваротаў працоўных.
Выданне паведамляе, што ідэолаг праінфармаваў актыў "аб метадах вывучэння сацыяльна-псіхалагічнага клімату ў калектывах, заклікаючы своечасова выяўляць сацыяльныя групы, якія патрабуюць асаблівай увагі, і прымаць канкрэтныя меры па зняцці праблемных пытанняў", а таксама заклікаў больш цесна супрацоўнічаць з прафсаюзамі і БРСМ. Таксама, на думку Дзмітрыя Вяроўкіна, пацоўныя мусяць актыўна падпісвацца на дзяржаўныя СМІ і "раёнку", каб быць "у курсе правядзення важнай палітычнай падзеі".
Яшчэ адзін рэцэпт поспеху - адзіныя дні інфармавання. Пра гэта на семінары паведаміла галоўны спецыяліст аддзела ідэалагічнай работы Вера Русецкая. "Многія пытанні, агучаныя падчас дзён інфармавання, вырашаюцца больш аператыўна, а людзі пераконваюцца ва ўважлівым да іх стаўленні" - цытуе "Трыбуна працы" меркаванне чыноўніцы.
