Светлагорская акруговая камісія не хоча друкаваць біяграфію кандыдата цалкам, бо лічыць яе агітацыяй
У Светлагорскай акруговай камісіі ўзніклі пытанні да біяграфіі кандыдата ў дэпутаты Юрыя Ляшэнкі. Па словах кандыдата, акруговая камісія не хоча друкаваць яго біяграфію цалкам, у тым выглядзе, як ён прадставіў у камісію, бо лічыць яе агітацыяй. «Прычапіліся да маёй біяграфіі. Маўляў, калі я пішу, што займаюся грамадскай дзейнасцю, ствараю працоўныя месцы, дапамагаю інвалідам і іншым неабароненым катэгорыям грамадзян – то гэта агітацыя, а не біяграфія! У камісіі сказалі, што мая біяграфія не павінна адрознівацца ад біяграфій іншых кандыдатаў, але гэта нонсэнс! Яны абяцаюць выразаць частку маіх дадзеных», - адзначыў Юрый Ляшэнка.
Зараз перамовы з акруговай камісіяй працягваюцца, але камісія запэўнівае, што ў такім выглядзе, як падаў кандыдат, біяграфія не будзе надрукавана.
У звестках пра сябе Юрый Ляшэнка падае, што займаецца прадпрымальніцтвам, стварыў у Светлагорску два транспартныя прадпрыемствы, і адпаведна – забяспечыў мясцовых жыхароў працоўнымі месцамі, з“яўляецца старшынёй і заснавальнікам дабрачыннага таварыства «Предтеча», узначальвае мясцовую суполку прафсаюзу «Салідарнасць», працаваў ва ініцыятыўнай групе супраць будаўніцтва заводу беленай цэлюлозы, і таксама – старшыня рэгіянальнага прадстаўніцтва Рэспубліканскай асацыяцыі інвалідаў-вазочнікаў. У біяграфіі кандыдат адзначаў, што не на словах, а на справе дапамагае эканоміцы раёну, змагаецца за інтарэсы мясцовых жыхароў перад чыноўнікамі, абараняе экалогію.
