Маладэчна: вынесена папярэджанне прадстаўніку БХД Паўлу Пракаповічу
Пятніцавы пікет 29 ліпеня ў Маладэчне прэтэндэнта ў кандыдаты па выбарчай акрузе № 73 Паўла Пракаповіча, які суправаджаўся правакацыяй невядомага, 1 жніўня займеў свой працяг. Спецыяльна дзеля разгляду падзей у той дзень было склікана адмысловае паседжанне акруговай камісіі. На ім справа была павернутая ў нечаканы бок, была разгледжаная заява жыхаркі горада Маладэчна Дрозд Таццяны Антонаўны, у якой яна выказала сваё меркаванне, што сумяшчаць антыалкагольную агітацыю, якую праводзяць хрысціянскія дэмакраты, са зборам подпісаў за вылучэнне ў кандыдаты зусім няправільна. Падобнае меркаванне выказала і член камісіі Паздзеева Святлана Міхайлаўна, якая апынулася на тым пікеце, дзякуючы тэлефоннаму званку з месца падзеі. Усе члены камісіі пагадзіліся са старшынёй камісіі Юрчык Святланай Васілеўнай, што мела месца парушэнне выбарчага заканадаўства. Члены камісіі аднагалосна прагаласавалі за вынясенне папярэджання Паўлу Пракаповічу.
Па факце ж напісання заявы прадстаўнікамі БХД ў Маладэчанскі РАУС на дзеянні невядомага правакатара ніякага адказу пакуль няма.
