У Івацэвічах сябра выбаркаму запрасілі на паседжанне акруговай камісіі яшчэ да яе стварэння
Першае паседжанне выбарчай камісіі па Івацэвіцкай акруге №11 прызначана на раніцу 29 чэрвеня, пра што яшчэ за два дні да падзеі паведамілі і актывісту Партыі БНФ Яўгену Сіцко, які быў вылучаны ў склад гэтага выбаркаму.
Самае цікавае, што запрашэнне па тэлефоне на згаданае паседжанне было зроблена раніцай 27 чэрвеня - у той час, калі камісія яшчэ не была створана. Склад усіх акруговых камісій у Брэсцкай вобласці на сёлетнія парламецкія выбары быў зацверджаны на супольным паседжанні аблвыканкама і абласнога савета дэпутатаў, якое пачалося у той жа дзень а 14-й гадзіне і працягвалася каля трох гадзінаў.
Атрымліваецца, што ў Івацэвічах пра тое, хто трапіць у склад выбарчай камісіі, ведалі яшчэ да выканання ўсіх неабходных працэдур і нават паспелі запрасіць тых, хто дакладна стане сябрам акруговага выбаркаму, на першае паседжанне.
