Самыя спрыяльныя ўмовы для збору подпісаў на пікетах у Віцебскай вобласці зацвердзіў Міёрскі райвыканкам
Адпаведнае рашэнне мясцовых органаў улады ўтрымлівае мінімум забаронаў у параўнанні з іншымі рэгіёнамі Віцебшчыны.
Паводле рашэння №492 ад 24 чэрвеня 2016г. , размешчанага на афіцыйным сайце Міёрскага райвыканкама пад рубрыкай “Выбары”, пікеты па зборы подпісаў нельга ладзіць толькі на тэрыторыях “установаў адукацыі” і “арганізацый аховы здароўя”. У параўннанні з іншымі рэгіёнамі, дзе забаронена ладзіць пікеты на чыгуначных і аўтастанцыях, бліжэй чым у 20-ці, а то і ў 50-ці метрах ад выканкамаў, судоў, міліцыі і райаддзелаў МНС, рашэнне Міёрскіх уладаў надзвычай дэмакратычнае.
Рашэнні ж іншых выканкамаў напісаны нібыта “пад капірку” і паўтараюць адны і тыя самыя забароны. Апрача, хіба што, Шаркоўшчынскага раёну: там пікеты забаронена ладзіць яшчэ і ў цэнтральным гарадскім скверы…
Вызначыць месцы, дзе забаронена ладзіць пікеты, мясцовыя ўлады мусілі да 27 чэрвеня. Адпаведныя рашэнні выканкамаў на Віцебшчыне датуюцца пераважна 24-м чэрвеня. Аднак дагэтуль незразумела, ці прынялі такое рашэнне адміністрацыі трох раёнаў абласнога цэнтра: на сайтах гарвыканкаму і аблвыканкаму пра месцы, дзе забаронена збіраць подпісы, няма ніякіх звестак.
