Кіраўніцтва Магілёўскай абласной выбарчай камісіі не змянілася
Кіраўніком Магілёўскай абласной камісіі па выбарах у парламент 28 чэрвеня ў чарговы раз абраны начальнік Галоўнага статыстычнага ўпраўлення Магілёўскай вобласці Валерый Берастаў.
Нагадаем, што 27 чэрвеня ў Магілёве былі ўтвораны 13 акруговых і адна абласная камісіі. Прадстаўнікі дэмакратычнай апазіцыі не былі ўключаныя ў іх склад. Стварэнне камісій праходзіла без абмеркавання вылучаных кандыдатур і галасавання па кожнай персаналіі.
Першае арганізацыйнае пасяджэнне абласной выбарчай камісіі адбылося сёння ў 10.00. Інфармацыя пра тое, што яно прызначанае, з'явілася на сайце Магілёўскага аблвыканкама ў 8.21. Сёння раніцай на пасяджанне быў запрошаны магілёўскі праваабаронца Барыс Бухель. На яго думку, цяперашнія члены камісіі яшчэ ўчора ведалі, што будуць абраныя.
"Агульнае ўражанне - спектакль. Правялі ўсе падазрона хутка. Бо людзей яшчэ з раёнаў сабраць трэба. А людзі ўсё занятыя. Каб яны загадзя спланавалі, іх трэба загадзя паведаміць. Значыць, яны загадзя ведалі, што іх абяруць. Учора а 18-й вечара скончылася паседжанне па фармаванні камісіі, а ў 10 раніцы ўжо ўсіх збіраюць ", - сказаў Бухель.
Паводле паведамлення на сайце Магілёўскага аблвыканкама, намеснікам старшыні камісіі абраны начальнік абласнога аддзела арганізацыйна-кадравай работы Аляксей Лаўранёнак, а сакратаром - пенсіянерка, раней - галоўны спецыяліст абласнога аддзела арганізацыйна-кадравай работы, Людміла Макаранка. Абодва яны працавалі ў абласной камісіі на дадзеных пасадах падчас шэрагу папярэдніх выбарчых кампаній.
