Праваабаронцы за свабодныя выбары

Праваабарончы цэнтр «Вясна» беларускі хельсінкскі камітэт

Таццяна Севярынец: “Пасля пікета нам давялося пісаць скаргі”

Віцебск. Агітацыйны пікет у падтрымку Таццяны Севярынец.
Віцебск. Агітацыйны пікет у падтрымку Таццяны Севярынец.

Кандыдатка ў дэпутаты  па Віцебскай-Чкалаўскай акрузе №18 правяла 25 жніўня першы пікет у Віцебску. Ён быў прымеркаваны да 25-х угодкаў  падзеі дзяржаўнага значэння:  25 жніўня 1991 г. Вярхоўны Савет надаў статус канстытуцыйнага закону  Дэкларацыі аб дзяржаўным суверэнітэце.

“Афіцыйна вызначанае месца для пікетаў у мікрараёне Білева – гэта бульвар, на якім “узараная” уся брукаванка. Ідуць рамонтныя работы. Зразумела, што мінакоў тут няма і быць не можа. Гэтай акалічнасці падзівіліся нават назіральнікі з АБСЕ – што мы стаім на гарадскім ускрайку ды яшчэ ў малапрыдатным месцы”, - кажа спадарыня Таццяна.

Віцебск. Месца правядзення агітацыйных пікетаў, вызначанае мясцовымі ўладамі.

Між тым для наведнікаў пікета кандыдатка і яе група падтрымкі арганізавалі некалькі сюрпрызаў. Да прыкладу, сімвалічнае “галасаванне” фасолінамі: ахвотным прапанавалі на выбар чорную і белую фасолю, каб апусціць яе ў “скрыню для галасавання”. Белую фасолю маглі скарыстаць тыя, хто выказваўся “за перамены”, а чорную – хто мае супроцьлеглае меркаванне…

На пікет з’явіліся і прадстаўнікі абласной выбарчай камісіі, і міліцыянты, а таксама – мікрааўтобус з камандай апанента спадарыні Севярынец, загадчыка кафедры медуніверсітэта Сяргея Занько. Справа адбывалася ў працоўны час, а мікрааўтобус быў службовы, падкрэслівае Таццяна Севярынец:

“Давялося падаць скаргу ў  Віцебскую-Чкалаўскую выбарчую камісію №18  на парушэнні  кандыдатам Занько  артыкула  №73 "Выбарчага кодэксу Рэспублікі Беларусь" аб роўнасці правоў і абавязках кандыдатаў. На маю думку, ён  парушыў артыкул ў частцы выкарыстання адміністрацыйнага рэсурсу: подпісы ў яго падтрымку ў ліпені збіраліся дактарамі  паліклінік падчас прыёму, для дастаўкі агітацыйных матэрыялаў і ўдзельнікаў пікета  ў працоўны час быў выкарыстаны службовы мікрааўтобус. Сам кандыдат, як сказалі пікетоўцы, “знаходзіцца на працы”  - чамусьці, у адпаведнасці з Кодэксам, ён не браў адпачынак”.

Віцебск. Падрыхтоўка да пікета кандыдата ў дэпутаты Сяргея Занько.

Віцебск. Агітацыйны пікет у падтрымку Сяргея Занько.

Скаргі на задзейнічанне адміністрацыйнага рэсурсу кандыдатам па Віцебскай-Чыгуначнай выбарчай акрузе №19 Васілём Чэканам, начальнікам Департамента па матэрыяльных рэзервах Міністэрства па надзвычайных сітуацыях Рэспублікі Беларусь падалі таксама ягоныя канкурэнты, грамадскія актывісты Алена Шабуня і Вадзім Кузьмін.
“Праваабаронцы за свабодныя выбары”


Каментары