Некаторыя раённыя СМІ Віцебшчыны да гэтага часу не паведамілі пра прызначэнне выбараў
Толькі палова “раёнак” Віцебскай вобласці размясцілі на сваіх сайтах інфармацыю пра будучыя выбары ў Палату прадстаўнікоў.
Інфармаванне выбаршчыкаў пра іх права ўзяць удзел у выбарах 11 верасня ўзялі на сябе афіцыйныя сайты райвыканкамаў. На кожным з іх з’явілася адмысловая рубрыка, дзе размяшчаюцца дакументы і звесткі пра падзею агульнадзяржаўнага маштабу. На большасці сайтаў прысутнічаюць указ пра прызначэнне даты выбараў і ўдакладненні межаў выбарчых акругаў на тэрыторыі раёна. Аднак ёсць прыклады і больш поўнага інфармавання выбаршчыкаў. Прыкладам, на сайце Гарадоцкага райвыканкама – ажно 9 спасылак на рознага кшталту інфармацыю пра выбары, у тым ліку на адмысловы рэспубліканскі інтэрнэт-рэсурс “Выборы -2016”. А таксама Каляндарны план выбарчай кампаніі. Дарэчы, ен ёсць і на 8-мі сайтах райвыканкамаў іншых рэгіёнаў.
Што да раённых газет, то з 21-го раёна Віцебшчыны адмысловую рубрыку займелі толькі 12 інтэрнэт-сайтаў мясцовых СМІ (па стане на 14 чэрвеня). Яшчэ некалькі “раёнак” размяшчаюць на сваіх інтэрнэт-старонках звесткі пра выбарчую кампанію, аднак не вылучаюць іх у асобны тэматычны раздзел. Але цэлы шэраг «раёнак» Віцебшчыны не закранае тэму выбараў увогуле. Сярод іх – “Чырвоны прамень” (Чашнікі), “Дзвінская праўда” (Верхнядзвінск), “Дняпроўская праўда” (Дуброўна), дзе няма не тое што інфармацыі пра будучыя выбары ў Палату прадстаўнікоў, але нават паведамлення, што прэзідэнцкім указам яны прызначаны на 11верасня.
Ігнаруючы тэму агульнадзяржаўнага значэння, усе без выключэння “раёнкі” актыўна пішуць пра 5-ты Агульнабеларускі нацыянальны сход.
Віцебскі праваабаронца Леанід Свецік бачыць пэўную супярэчнасць у тым, што мясцовыя СМІ надаюць выбарчай тэматыцы няшмат увагі, але Віцебская вобласць штораз дэманструе высокі паказнік яўкі выраршчыкаў:
“Я неаднаразова заўважаў, што цягам выбарчых кампаній апошняга часу на Віцебшчыне ў значнай ступені выкарыстоўваецца так званы адміністрацыйны рэсурс. Інакш кажучы, людзей “заганяюць” на выбары, асабліва ў сельскай мясцовасці, і вобласць аказваецца на першым або другім месцы па яўцы выбаршчыкаў. А ў такіх умовах, калі існуе загад “забяспечыць яўку”, то неістотнай робіцца роля СМІ – бо нічога не залежыць ад інфармаванасці насельніцтва. І тое, што раённы друк не прыкладае асаблівых намаганняў, каб паведамляць чытачам хаця б пра прызначэнне даты выбараў або каляндарныя этапы выбарчай кампаніі, ёсць ускоснай прыкметай таго, што вынік гэтай кампаніі мала залежыць ад грамадзянскай актыўнасці простых беларусаў”.
